ఏడబోయినవురా

    ఒరేయ్ చిన్నోల్లచిన్నోడా ఎక్కడికి బోయినవురా
ఎన్నే ళ్ళయ్యిందిరా నిన్ను జూసి  మాయమైతివిగదరా మమ్ముమసిబూసి
ఏడబోయినవురా ఎప్పుడొస్తవురా

   ఉండరా కాసేపంటే మల్లొస్తనంటివి  తినరా అన్నమంటే బుక్కడే తింటివి
 అమ్మతో తినకుంటే బాధైతదంటివి  అరగంటకే అమ్మ రమ్మన్నదంటివి
ఆరేండ్లయినా మల్ల కానరాకుంటివి  ఏడబోయినవురా ఎప్పుడొస్తవురా

  గల్ఫ్ బేకరీలో కేకిష్టమంటివి  తీరతెచ్చేసరికి నువ్వెల్లిపోతివి
మీనాన్నకు కుడి భుజం లాగుంటివి  పెదనాన్నలకు పెద్ద దోస్తువైతిరిగితివి
పంచపాండవుల్లెక్క అన్నదమ్ములతోడ  ఆడుకుంటివిగదరా ఆరిందలాగా
ఏడబోయినవురా ఎప్పుడొస్తవురా

  బరువంతమోస్తనని ఆశజూపిస్తివి  నాలుగు గుంజలమీద బరువిడిసి పోతివి
ఏమిగావాల్నన్న నిన్నడగమంటివి  పెదవిదాటేలోగ పుడమిలోదాగితివి
కంటిధారలచార మాయనేలేదు  గొంతుదాటి మాటరాకనేపాయె
ఏడబోయినవురా ఎప్పుడొస్తవురా

  నీపెండ్లికి పూలకొప్పులనుకుంటిమి  నడుములకు వడ్డాణం హద్దులేదంటిమి
మాతరంలో చిన్నోడి పెండ్లి వైభవమిది  సరదసరదాలతో సంబరాలనుకుంటిమి
మీఅమ్మ కండ్లల్ల దీపాలు వెలగంగ  ఇంట్లజేరినవా బోసినవ్వులలో
ఇన్నేళ్ళ దిగులంత పరదసాటుకుతోసి  ఆటపాటలమాటు మాయజేసితివా
వెల్లొస్తివా నువ్వు మల్లొస్తివాకొడుక  ఇంటిదీపాలన్నీ వెలిగిస్తివా
ఏడబోయినవురా ఎప్పుడొస్తవురా

చిన్నప్పటి చిత్రాలు

గొరుకోలు పొడవంగలేసి ఎన్నోపనులుచేసుకుంది .పొయిసుట్టు ఎర్రమట్టితో అలికి ముగువేసి వత్తికుండనిండ నీల్లుబోసి పొయ్యిరాజేసింది. పక్కన చిన్న దాడిపొయ్యిమీద పాలకుండబెట్టింది.  కుండలో వండిన అన్నాన్ని జరంతపలుకుండంగనే నిన్న కడిగి పెట్టిన శిబ్బిపెట్టి అమాంతం దించి గుంతలో పెట్టిన గిన్నెలో గంజివొంచింది. కాసింతసేపైనంక కుండను తాటాకులతో చేసిన సుట్టకుదురు మీద పెట్టింది. ఆగంజితోనే బిడ్డకు  గోర్లకొట్టి తలకుబోసిందిసమాసిగ. గోలెంలనీల్లల్లో ఏరుశనగ శెక్క, ఉప్పు, గంజి అన్నీ ఏసింది కుడితికోసం.  ఇంటాయన పుట్టెడువడ్లుపోసుకుని పేటకుబొయ్యి అమ్ముకొస్తనని పోతాంటే దోతిగుడ్డని రెండుముక్కలుగా చిర్రున చీరి కిందపరచి రెండు ఇస్తరాకులుఏసి అందులో పుల్లవాసనతో పొడపొడలాడుతున్న అన్నంలో ఇంత మామిడికాయ తొక్కు పచ్చెన్న ఏసి పైనొకవిస్తారేసి మూటగట్టింది .ఈఅన్నం రెండురోజులయినా పాడుగాదు కలివల్ల.  స్టీలుటిపినీలో సల్లబోసిఇంత ఉప్పేసి బండికొయ్యకితగిలించింది. పిల్లకు నెత్తిన సమురురాసి పేలుజూసి సమాసిగజుట్టుదువ్వి బిర్రుగ జడేసింది.  సందకాడ పొలం నుంచి బరెగొడ్లు ఇంటికొచ్చినాయి.  బొచ్చెల్లో నానబెట్టిన దాన తెచ్చిపెట్టింది. ఆ దానలో ఏమేమి వున్నయో  మీకు జెప్పనా.  ఉలవలు,పెసల్లు, జొన్నలు, మక్కలు బొబ్బర్లు ఇసుర్రాయితో ఇసిరి బస్తలల్లనింపి రోజింత నీల్లుసల్లి ఉప్పేసి కలిపి పెడితే సందకాడికి నాని వుంటది. పొద్దున్నుంచి కష్టపడిన ఆవులు ఆవురావురని తింటయి. సందకాడ ఇంటిముంగల నీల్లుసల్లి ఊడ్చి మంచాలేసి పక్కలేసి వుంచుతారు జీతగాల్లు. పక్కమీద కూసోని రావుడూ భీవుడూ అంటూ పిలిస్తే దగ్గరకు వచ్చిన ఆవులను గంగడోలు నివురుతావుంటే ఎంతసేపైనా నిమిరిచ్చుకుంటనే వుంటయి. తర్వాత గుంజలకు కట్టేస్తే నెమరేసుకుంటావుంటాయి..   

తొందరేల

,,ఎందుకంతతొందర ఇపుడేమయిందనీ
వుందిగా ముందర అంత ఒరవడెందుకనీ
నడిచొచ్చే తోవల్గో తుప్పలూ రాళ్ళూ ముళ్ళూ
వాటినే చూసావంటే సాగదుగా నీపయనం

 ఒక్కసారి ఏరిచూడు రాసబాట కాదామరి
ఆరాతిరాశిపొదల్లోనె వెతికిచూడరాదామరి
 రంగురాళ్ళ జాడలేమో రతనాలే దొరకునేమో
జీవితదారుల్లోదొరికేటి జ్ఞాపకాల సుమాలను
రతనాలవంటిస్నేహాలను మూటగట్టకోనలేమా

మన తదుపరి జీవికకై మంచిఅనే సువాసనలు
కొంతైనా పంచాలిగా ఇపుడైనా చేయాలిగా
ఆగుఆగు కనీసం ఒక్క సారి తిరిగి చూడు
నేనునేను నాదంటూ మొండికేసే తీరు చూడు

రాలేదా లేశమైన ఆధ్యాత్మిక భావజాలు
పోలేదా నిన్నటిఅనువంశిక భేషజాలు

పంచేంద్రియాలు

మా పాత స్నేహితుల్లో ఒకజంట షష్టిపూర్తిచేసుకుంటున్నారని వెళ్ళాం.  నిజంగా అద్భుతం మేము
 వెళ్ళకుండా వుంటే చాలా మిస్సయ్యేవాళ్ళం. మిగతా ఫ్రెండ్స్ తో కలిసి అల్లరి గా ప్రయాణించి
అక్కడికి చేరుకున్న మాకు పవిత్రమైన కర్పూరపరిమళాలు మా నాసికాపుటాలకు సోకి అల్లంత
దూరంనుండేఆహ్వానించాయి. కారుదిగుతూనే దూరంగా ద్వారబంధాలకు పందిళ్ళకువేసిన
పుష్పమాలాలంకరణ నయనానందకరం. ఎదురొచ్చిన పాతమిత్రుల పలకరింపు కరస్పర్షలతో
తనువంతా పండింది ఎండలో. వేదపండితుల మంత్రోచ్ఛారణలతో పాజిటివ్ ప్రకంపనాలు
వీనులగుండా లోలోపలికి ప్రసరించి పవిత్రతనతో ఆపాదమస్తకం అలరించింది. వారిచ్చిన
విందుభోజనాలు మా జిహ్వచాపల్యాన్ని చల్లార్చి జఠరాగ్నిపై నీళ్ళుచల్లి సంత్రుప్తి పరిచాయి.
ఇలా మా పంచేంద్రియాలను సంతుష్టపరిచిఆనందంగా ఇల్లు చేరాము.

నాబలం

నువ్వేకదా నా బలం  నువ్వేకదా నా బలహీనత.
నువ్వే కదా  నేర్పావు నాలోఆత్మవిశ్వాసం
బేలనైన నన్ను ధీరవనితను చేసావు
తడేమిటి తంతోంది మనసు మాగాణి పారాలని
దేవుడో విధిరాతో తలరాతో ఎవరో ఏదో
మేలు చేయరామనకు అంతోఇంతో
తొందరపడి నేనెందుకు చింతచేయబూనాలి
ఎన్నోఇచ్చావు ఎన్నెన్నో చేసావు
నీకు చేయనాకులేని శక్తిని అరువుతెస్తున్నా
రోగాలతో సహవాసం చేయలేక చస్తున్నా
నా సు" మతి"కెన్ని సొట్టలో రాటుదేల జిందగిలో
ఆల్ఈజ్ వెల్ ఆల్ఈజ్ వెల్ అంటున్న గుండెగూటిలో
అయినా మదినిండా నీవిచ్చిన ధైర్యంతో
అలుపులేని పోరాటం గెలుపు తీరంవైపు పయనం.

గర్విత

 
   ఆమె పంతులు బిడ్డ. అప్పుడప్పుడే పంతులు పోయి సార్ వచ్చేరోజులవి. నలభై ఏళ్ళ క్రితం మాట. పదోతరగతి ఫేలయ్యి నాన్నతోపాటూ రాజాపేట వెళ్ళింది.  రూంకి వున్న కిటికీలోంచి స్కూలుకు వస్తూవెళుతూ వుండే పిల్లలు అదిగోరా సారుబిడ్డ అదిగో అంటూ తనను చూస్తుంటే ఎంతో గర్వంగా వుండేది ఆరోజుల్లో. 
   ఆతర్వాత పెళ్లి పిల్లలు ఎక్కడో బొగ్గు బావిలో శ్రీవారి ఉద్యోగం. పుట్టిన ఊరి నుండి ఎంతో దూరం ప్రయాణం. అత్తమామల ఇంట పెద్ద కోడలై బంధు జనానికి తలలో నాలుకై ఆత్మబంధువైన గర్వంతో హ్రిదయం ఉప్పొంగినవేళ తనెంత అద్రుష్టవంతురాలోనని మురిసింది.  ఇలా కొన్నాళ్లు గడిచాక మళ్ళీ చదవాలనే కోరిక బలీయమై పదిలో మిగిలిన సబ్జెక్టు, ఇంటరూ, ఎక్ట్సర్నల్లో డిగ్రీచేసింది శ్రీవారి సహకారం తో .పదితోనే ఆగిన తన స్నేహితురాళ్ళను తలచుకుని మళ్ళీ గర్వపడింది.  కొడుకు ని ఇంటర్  విజయవాడలో చేర్చి చిన్నోడితోపాటూ హైదరాబాదు మకాం మార్చింది ఉద్యోగం వదలుకుని. పిల్లల్ని చెరోదేశంపంపింది పైచదువులకి  .జీవితంలో హడావుడి కాస్త తగ్గింది.  ఇంటి ముందు శుభ్రం చేయించి షటిల్ ఆడటం మొదలెట్టింది పదిమందితో. ఈఆట ఆమె జీవితానికే అఖండ దీపం అవుతుందని నాడు అనుకోలేదు.  నేడు అరవైయ్యోపడిలో వున్నా ఆడగలుగుతున్నందుకు మరీమరీ గర్విస్తున్నది.  భర్తతో, మరదులతో,తోడికోడలుతో,కొడుకులతో ఇపుడు మనవడితో మనవరాళ్ళతో కూడా ఆడుతున్నందుకు ఎంతో గర్వంగా వుందామెకు.  ఆరోగ్యం చెక్ పెట్టినా ఆటంటే లేచొస్తుంది ప్రాణం. ఇంటి నిండా కొడుకులు కోడళ్ళు మనవడూ,మనవరాళ్ళూ ఎనభై ఆరేళ్ల మాత్రుమూర్తితోసహా పనివారూ పరివారం తోడుగా ఎంతో సంతోషంగా చక్కని కుటుంబ బంధాలతో మహా గర్వంగా గడుస్తున్నాయి రోజులు.  ఇక  ప్రశాంతంగా సంత్రుప్తగా ఎప్పుడైనా ఏమైనా ఈజీవనయానం ఇలా సాగితే చాలు.

కోటి దీపోత్సవం.

మొన్నీమధ్య కోటిదీపోత్సవానికి ఎన్టీఆర్ స్టేడియానికీ వెళ్లొచ్చాను .నిజంగా ప్రతివాళ్లూ ఓసారి తప్పకుండా చూడాల్సిన వైభోగమది . .గతసంవత్సరం మాకాలనీవాళ్ళు దాండియాగ్రూపుగావెళ్లి చూసొచ్చి చాలాబాగుందని చెప్పారు .చాలా ఆర్గనైజ్డుగా చేస్తున్నారు తొక్కిసలాట తోపులాట లాంటివి ఏవి లేవనిచెప్పారు .ఓసారి చూడాల్సినదేనని ఈసారి వారితోపాటూ నన్నుతీసుకెళ్ళారు ముఖ్యంగా నాతోటికోడళ్లు .గ్రూపంతా ఒకేరకమైన చీరలు కట్టగా నేనూ అదేరంగుచీరకట్టుకొని వారితోపాటు వెళ్ళాను .గ్రూపువాళ్ళందరూ నన్నుసాదరంగా తోడ్కొనివెళ్ళారు ఆత్మీయంగాతొమ్మిదో రోజు .
అల్లంతదూరంనుండే కోటిదీపోత్సవం భక్తిటివి అంటూ కనబడుతున్నది ధగధగాయమానంగా వెలుగులువిరజిమ్ముతూ .ప్రాంగణంలో ఆంజనేయుడు దుర్గాదేవి నంది బొమ్మలు వున్నాయిఅక్కడక్కడ  .అదోలోకం అద్భుతలోకం సురలోకం .జనంజనం ప్రభంజనం ఎటుచూస్తేఅటు కిటకిటలాడుతున్నారు .ఈసారి బాగా వచ్చారు జనం అనిఅనుకుంటున్నారు .మమ్మల్నికాస్త ప్రత్యేకంగా బారీకేడ్లదారిగుండా వాలంటీర్లు పంపిస్తున్నారు. మాచేతిలో దాండియా కర్రలు మా అందరిదీ ఒకేరంగు చీరలు మహాగొప్పగా ఠీవిగా నడుస్తూ మాకుకేటాయించిన డయాసుదగ్గరికి చేరుకున్నాము .హమ్మయ్య ఇక్కడకాస్త ప్రశాంతంగా ఉందని మా గ్రూపులోని పిన్నిగారిని కూర్చోబెట్టి మా హ్యాండ్బ్యాగులూ ఆమెవద్దపెట్టాము .అలాంటి డయాసులు రకరకాల ఎత్తుల్లో కొలతల్లో అటూఇటూచాలానే వున్నాయి. దేవేరులిద్దరిమధ్య శ్రీవేంకటేశ్వరుడు తెల్లనిరాళ్ళుపొదిగిన విగ్రహాల్లో దేదీప్యమానంగా తళుకులీనుతూ భక్తులను పరవశింపచేస్తున్నాడు. మరోవైపు రెండు మూడు దొంతరలుగావున్న అతి పెద్ద డయాస్ మీద వెనుక వైపున చాలా పెద్దగా హిమశిఖరం పైన పరమశివుడు శివుని పై చంద్రవంకా ముందర ఎత్తైన శివలింగం మరోపక్క మంచు లింగం వుండి చూపుతిప్పుకోనివ్వట్లేదు. మాస్టర్ తన మూడు గ్రూపులతో దేవుని శావకి ముందు డమరుక నాదాలతో, వాయిద్యాలతో వున్న తోవలో దాండియాచేయిస్తూంటే అందులో భాగమైనాము .మామధ్యలోకి ఎవరూ రాకుండా అంతరాయం కలుగకుండా రెండు బారికేడ్లమధ్య వాలంటీర్స్ మమ్మల్ని అలా తీసుకెళ్లారు. ఎదురెదురు నిలబడి కోలాటం వేస్తూ నడుస్తూ వెళ్తున్నాము. మధ్యలో ఒకతను నడిచే దారి వుండటానికి అటూఇటూ నడుస్తునేవున్నాడు.  పీఠాధిపతి గారూ పారిశ్రామిక వేత్తలూ మా మధ్యలోంచివెళ్ళి శివలింగం ముందు దీపాల్ని వెలిగించారు . అలా అలా నిరంతరాయంగా 45 నిమిషాల సేపు ప్రాంగణం అంతా మలుపులు తిరుగుతూ దాండియాచేస్తునే వున్నాము.  చెమటలు పడుతున్నాయి దాహం వేస్తుంది కాళ్ళులాగుతున్నాయి అయినా ఏదో ఉత్సాహం .దాండియాచేస్తూ వెళ్తుంటే దారికి ఇరువైపులా బారులు తీరిన జనం వాళ్ళ ఫోన్లో వీడియోలు తీసుకుంటున్నారు. మంచినీళ్లు అందిస్తున్నారు మాకు .చాలదాఇదిమాకు ఇంకేం కావాలి. అహో పరమాద్భుతం. ఆతర్వాత దాండియాగ్రూపు మళ్ళీ ప్రధాన డయాస్ మీద కూడా తందనానా అహో అంటూ చేసారు. ఓవైపు ఆవులేగకు పాలిస్తున్న ద్రుశ్యం,మరోవైపు మహానంది.  మధ్యలో వేదపండితులు మంత్రోచ్చారణలతో శ్రీనివాసుని కల్యాణం చేసారు.  దేవతలంతా భూలోకం తరలివచ్చారా అన్నట్లుగా వుంది.  ఒకరిని మించి ఒకరం చేయాలనే ఆరాటం .డ్రోన్ లో వీడియో తీస్తున్నారు క్రేన్తో వీడియో తీస్తున్నారు .ఈ మాయలో అలసట మరచి ఆనందంగా వేస్తూవేస్తూ తిరిగి మా డయాస్ దగ్గరికి చేరాము.  కాసేపట్లో అందరూ దీపాలు వెలిగిస్తున్నారు . చాలా పెద్ద ప్లేటు మధ్యలో దీపం .ఇలాంటివి చాలా వున్నాయి వరుసగా. దొంతరలుగావున్న దీపాలు కూడా చాలా వున్నాయి వత్తులు వేసి నూనె వేసి రడీగా. నాగదీపాలట మూడు నాలుగు వున్నాయి. నాలుగు వరుసలుగా ఫ్రేమ్ చేసి దానికి ప్రమిదలు వెల్డ్ంగ్ చేసి ఓవైపు పాముపడగలాగా పైకిలేపి దానికి దీపాలు పెట్టి మధ్యలో ఒకతను నిలబడి తనపైకండువాతో రెండు వైపులా స్టాండ్కికట్టి మెడమీద వేసుకొని దాన్ని తిప్పుతూ వున్నాడు వెలుగుతున్న దీపాలతో.  ఇక అఘోరా వేశాలువేసినవాళ్ళు త్రిశూలం తో ఎగురుతూ తిరుగుతున్నారు . త్రిశూలం మధ్యదానిలోంచి వెలుగులు చిమ్ముతున్నాయి. ముచ్చటగా వుంది ద్రుశ్యం.

అప్పటి దాకా ధగధగాయమానంగా వెలుగుతున్న కరెంటుని ఆపేశారు. ఒక్కసారిగా భక్తులు తమతమ తావులలోని నూనె దీపాలు వెలిగిస్తున్నారు. శివతాండవం పాటలు పెద్దగా పెట్టారు . బ్రహ్మాండంగా తయారైవచ్చిన నర్తకీమణులు లయబద్దంగా నాట్యం చేస్తున్నారు. వారి ముందు మేము దొంతరదీపాలు పట్టుకుని నిలబడినాము. వారికి వెనుక వేంకటేశ్వరస్వామి పద్మావతీ అమ్మవార్ల అలంకరణలతో ఇద్దరు పిల్లలు నిలుచున్నారుపైన. మాఅందరి వెనక ఎత్తైన శివలింగం వుంది.  క్రేన్ బుట్టలో ఇద్దరు ఎక్కి పైకి వెళ్లి ఆ శివలింగం పైన పూలు చల్గుతున్నారు. పటాకులు పేల్చారు. మావెనుకవరుస నాట్యగత్తెలు కూడా పూలు దోసిళ్ళతో జల్లుతున్నారు.

ప్రాంగణం అంతా కర్పూర పరిమళాలు దీపాలపొగ ఓపెన్ ప్లేస్. చల్లని గాలులు ఆధ్యాత్మిక వాతావరణం శివతాండవ న్రుత్యాలు పాటలకి వళ్ళంతా కళ్ళే అయ్యాయి. శివోహం శివోహం అంటూ మనసు పాటపాడుకుంటున్నది. పరిపూర్ణ ఆనందం ప్రతివారికి ప్రసాదం గా అందింది. పట్టుపట్టి తీసుకెళ్ళిన నావాళ్ళందరికీ, గ్రూపు సభ్యులకు,గణేశ్ మాస్టర్ కి భక్తి టీవీ వారికి వందనాలు.