Saturday 22 December 2018

కోటి దీపోత్సవం.

మొన్నీమధ్య కోటిదీపోత్సవానికి ఎన్టీఆర్ స్టేడియానికీ వెళ్లొచ్చాను .నిజంగా ప్రతివాళ్లూ ఓసారి తప్పకుండా చూడాల్సిన వైభోగమది . .గతసంవత్సరం మాకాలనీవాళ్ళు దాండియాగ్రూపుగావెళ్లి చూసొచ్చి చాలాబాగుందని చెప్పారు .చాలా ఆర్గనైజ్డుగా చేస్తున్నారు తొక్కిసలాట తోపులాట లాంటివి ఏవి లేవనిచెప్పారు .ఓసారి చూడాల్సినదేనని ఈసారి వారితోపాటూ నన్నుతీసుకెళ్ళారు ముఖ్యంగా నాతోటికోడళ్లు .గ్రూపంతా ఒకేరకమైన చీరలు కట్టగా నేనూ అదేరంగుచీరకట్టుకొని వారితోపాటు వెళ్ళాను .గ్రూపువాళ్ళందరూ నన్నుసాదరంగా తోడ్కొనివెళ్ళారు ఆత్మీయంగాతొమ్మిదో రోజు .
అల్లంతదూరంనుండే కోటిదీపోత్సవం భక్తిటివి అంటూ కనబడుతున్నది ధగధగాయమానంగా వెలుగులువిరజిమ్ముతూ .ప్రాంగణంలో ఆంజనేయుడు దుర్గాదేవి నంది బొమ్మలు వున్నాయిఅక్కడక్కడ  .అదోలోకం అద్భుతలోకం సురలోకం .జనంజనం ప్రభంజనం ఎటుచూస్తేఅటు కిటకిటలాడుతున్నారు .ఈసారి బాగా వచ్చారు జనం అనిఅనుకుంటున్నారు .మమ్మల్నికాస్త ప్రత్యేకంగా బారీకేడ్లదారిగుండా వాలంటీర్లు పంపిస్తున్నారు. మాచేతిలో దాండియా కర్రలు మా అందరిదీ ఒకేరంగు చీరలు మహాగొప్పగా ఠీవిగా నడుస్తూ మాకుకేటాయించిన డయాసుదగ్గరికి చేరుకున్నాము .హమ్మయ్య ఇక్కడకాస్త ప్రశాంతంగా ఉందని మా గ్రూపులోని పిన్నిగారిని కూర్చోబెట్టి మా హ్యాండ్బ్యాగులూ ఆమెవద్దపెట్టాము .అలాంటి డయాసులు రకరకాల ఎత్తుల్లో కొలతల్లో అటూఇటూచాలానే వున్నాయి. దేవేరులిద్దరిమధ్య శ్రీవేంకటేశ్వరుడు తెల్లనిరాళ్ళుపొదిగిన విగ్రహాల్లో దేదీప్యమానంగా తళుకులీనుతూ భక్తులను పరవశింపచేస్తున్నాడు. మరోవైపు రెండు మూడు దొంతరలుగావున్న అతి పెద్ద డయాస్ మీద వెనుక వైపున చాలా పెద్దగా హిమశిఖరం పైన పరమశివుడు శివుని పై చంద్రవంకా ముందర ఎత్తైన శివలింగం మరోపక్క మంచు లింగం వుండి చూపుతిప్పుకోనివ్వట్లేదు. మాస్టర్ తన మూడు గ్రూపులతో దేవుని శావకి ముందు డమరుక నాదాలతో, వాయిద్యాలతో వున్న తోవలో దాండియాచేయిస్తూంటే అందులో భాగమైనాము .మామధ్యలోకి ఎవరూ రాకుండా అంతరాయం కలుగకుండా రెండు బారికేడ్లమధ్య వాలంటీర్స్ మమ్మల్ని అలా తీసుకెళ్లారు. ఎదురెదురు నిలబడి కోలాటం వేస్తూ నడుస్తూ వెళ్తున్నాము. మధ్యలో ఒకతను నడిచే దారి వుండటానికి అటూఇటూ నడుస్తునేవున్నాడు.  పీఠాధిపతి గారూ పారిశ్రామిక వేత్తలూ మా మధ్యలోంచివెళ్ళి శివలింగం ముందు దీపాల్ని వెలిగించారు . అలా అలా నిరంతరాయంగా 45 నిమిషాల సేపు ప్రాంగణం అంతా మలుపులు తిరుగుతూ దాండియాచేస్తునే వున్నాము.  చెమటలు పడుతున్నాయి దాహం వేస్తుంది కాళ్ళులాగుతున్నాయి అయినా ఏదో ఉత్సాహం .దాండియాచేస్తూ వెళ్తుంటే దారికి ఇరువైపులా బారులు తీరిన జనం వాళ్ళ ఫోన్లో వీడియోలు తీసుకుంటున్నారు. మంచినీళ్లు అందిస్తున్నారు మాకు .చాలదాఇదిమాకు ఇంకేం కావాలి. అహో పరమాద్భుతం. ఆతర్వాత దాండియాగ్రూపు మళ్ళీ ప్రధాన డయాస్ మీద కూడా తందనానా అహో అంటూ చేసారు. ఓవైపు ఆవులేగకు పాలిస్తున్న ద్రుశ్యం,మరోవైపు మహానంది.  మధ్యలో వేదపండితులు మంత్రోచ్చారణలతో శ్రీనివాసుని కల్యాణం చేసారు.  దేవతలంతా భూలోకం తరలివచ్చారా అన్నట్లుగా వుంది.  ఒకరిని మించి ఒకరం చేయాలనే ఆరాటం .డ్రోన్ లో వీడియో తీస్తున్నారు క్రేన్తో వీడియో తీస్తున్నారు .ఈ మాయలో అలసట మరచి ఆనందంగా వేస్తూవేస్తూ తిరిగి మా డయాస్ దగ్గరికి చేరాము.  కాసేపట్లో అందరూ దీపాలు వెలిగిస్తున్నారు . చాలా పెద్ద ప్లేటు మధ్యలో దీపం .ఇలాంటివి చాలా వున్నాయి వరుసగా. దొంతరలుగావున్న దీపాలు కూడా చాలా వున్నాయి వత్తులు వేసి నూనె వేసి రడీగా. నాగదీపాలట మూడు నాలుగు వున్నాయి. నాలుగు వరుసలుగా ఫ్రేమ్ చేసి దానికి ప్రమిదలు వెల్డ్ంగ్ చేసి ఓవైపు పాముపడగలాగా పైకిలేపి దానికి దీపాలు పెట్టి మధ్యలో ఒకతను నిలబడి తనపైకండువాతో రెండు వైపులా స్టాండ్కికట్టి మెడమీద వేసుకొని దాన్ని తిప్పుతూ వున్నాడు వెలుగుతున్న దీపాలతో.  ఇక అఘోరా వేశాలువేసినవాళ్ళు త్రిశూలం తో ఎగురుతూ తిరుగుతున్నారు . త్రిశూలం మధ్యదానిలోంచి వెలుగులు చిమ్ముతున్నాయి. ముచ్చటగా వుంది ద్రుశ్యం.

అప్పటి దాకా ధగధగాయమానంగా వెలుగుతున్న కరెంటుని ఆపేశారు. ఒక్కసారిగా భక్తులు తమతమ తావులలోని నూనె దీపాలు వెలిగిస్తున్నారు. శివతాండవం పాటలు పెద్దగా పెట్టారు . బ్రహ్మాండంగా తయారైవచ్చిన నర్తకీమణులు లయబద్దంగా నాట్యం చేస్తున్నారు. వారి ముందు మేము దొంతరదీపాలు పట్టుకుని నిలబడినాము. వారికి వెనుక వేంకటేశ్వరస్వామి పద్మావతీ అమ్మవార్ల అలంకరణలతో ఇద్దరు పిల్లలు నిలుచున్నారుపైన. మాఅందరి వెనక ఎత్తైన శివలింగం వుంది.  క్రేన్ బుట్టలో ఇద్దరు ఎక్కి పైకి వెళ్లి ఆ శివలింగం పైన పూలు చల్గుతున్నారు. పటాకులు పేల్చారు. మావెనుకవరుస నాట్యగత్తెలు కూడా పూలు దోసిళ్ళతో జల్లుతున్నారు.

ప్రాంగణం అంతా కర్పూర పరిమళాలు దీపాలపొగ ఓపెన్ ప్లేస్. చల్లని గాలులు ఆధ్యాత్మిక వాతావరణం శివతాండవ న్రుత్యాలు పాటలకి వళ్ళంతా కళ్ళే అయ్యాయి. శివోహం శివోహం అంటూ మనసు పాటపాడుకుంటున్నది. పరిపూర్ణ ఆనందం ప్రతివారికి ప్రసాదం గా అందింది. పట్టుపట్టి తీసుకెళ్ళిన నావాళ్ళందరికీ, గ్రూపు సభ్యులకు,గణేశ్ మాస్టర్ కి భక్తి టీవీ వారికి వందనాలు.

Saturday 18 August 2018

కంబోడియా

 
  ఈమధ్య మా స్నేహితులతో కలిసి కంబోడియా వెళ్ళి వచ్చాము. అక్కడ బల్లపరపుగా వున్న బండలపై ప్రవహించే వాగు లో ఆబండలపై శివలింగాలుచెక్కివున్నాయి .ఒకటో రెండో కాదు వేవేల లింగాలు అలా కనుచూపుమేర నీటిలో పారదర్శకంగా కనిపిస్తూ కనువిందు చేస్తాయి.  ఒకచోట శ్రీమహావిష్ణువు శేష శయ్యపై పవళించగా లక్ష్మీ దేవి కాళ్ళు పడుతున్న ద్రుష్యం కూడా కనబడుతోంది.  దీర్గచతురస్ర ఆకార పరిధిలో యాభైయ్యారు లింగాలున్నాయి.  అలా కొన్ని చిన్నవి, కొన్ని పెద్దవి, మరికొంచెం పెద్దవిగా వున్నాయి. పచ్చని పరిసరాలతో చల్లనిగాలులతో మనకు స్వాగతం పలుకుతోంది. పవిత్ర జలమని ఆనీటిని తీసుకుని తలపై చల్లుకుంటూ తన్మయులయ్యాము. ఆపక్కనే ఊయల ఏర్పాటు చేశారు ఎందుకోఏమో. తలాకాసేపు ఊగుతూ సంబరపడినాము. ఒక్క సారి ఊహించండి ఎంతటి ఆనందం మన సొంత మో. 

 కంబోడియా రాజుకి ఈనీటితో మంగళస్నానం చేయించేవారట. అంకుర్వాట్ ఆలయ పరిసరాల్లోని ఈపవిత్రజలాల్ని దాదాపు నాలుగైదు గంటల ప్రయాణ సమయం తర్వాత రాజధాని ఫెనాంఫెన్ లోని రాజప్రాసాదానికి తెచ్చి గంగాళాల్లో నింపి మంత్రోఛ్చారణలతో స్నానం చేయించేవారట.

Monday 23 July 2018

ఓ బిడ్డ కథ.

  ఆనూనె ఇసుంటబెట్టు అంటూ కాస్త చేతికి తీసుకుని నెమ్మదిగా కాళ్ళకు నూనె రాస్తూ... ఏందేఇదీ ఎన్నాళ్ళు ఇలా బాధపడుతవ్. ఇగ తగ్గదా బిడ్డా. మంచి డాక్టర్లు ఎవ్వరు లేరా.  ఇంకెక్కడన్నా ఎంతఖర్చయినా సూయించుకుందాము. దేశంలో ఎవ్వరు లేరానె దీన్ని బాగుజెయ్య. ఎంతో ఆవేదనగా అంటున్న తల్లికి  వారానికి రెండు సార్లన్నా ఇలా బాధపడుతున్న తనకు ఏంచెప్పాలి .

  తగ్గదమ్మా ఇద్దరు డాక్టర్లు ఇదే చెప్పారు. ఇక ఇంతే ఇట్లనే బతకాలి అంటూ నిట్టూర్పు విడిచింది అమ్మాయి. ఇలా ఎన్నిసార్లు చెప్పినా మరచిపోయి ఆ వాసినకాళ్ళను చూసినప్పుడల్లా బాధపడుతునేవుంటది. తనకొచ్చిన అనారోగ్యం చెప్పలేక తనకు క్యాన్సర్ అని, రేడియేషన్ సైడ్ ఎఫెక్ట్ అని చెప్పి ఆముసలితల్లిని బాధపెట్టటం ఎందుకని లోలోపల మదనపడింది. ఏదో లేవే ఈమాత్రం తిరగగలుగుతున్నా. ఇంట్లో అందరికీ నా చేతనయినంతవరకూ సహకరిస్తున్న. నలుగురు పిల్లలు స్కూలుకు వెళ్ళొస్తరు. ముగ్గురు పనోళ్ళకువేళకింత పెట్టాలి. పనులు పురమాయించాలి. కొడుకులు కోడళ్ళు ఎవరిపనికివారు వెళ్తారు నన్ను నమ్ముకుని. వాళ్ళకి నాఅవసరం వుందో లేదో తెలియదు కానీ నేనైతే కాస్తో కూస్తో ఉపయోగపడుతున్నాననే అనుకుంటున్నాను. ఇక మీఅల్లుడు. ఏంచెప్పాలి ఎప్పుడూ ఫోను తోనే . నేను బాగనే వున్నననుకుంటడు. నామీద ఎంత నమ్మకం. ఆయన టెన్షన్ లు బిజినెస్ ముచ్చట్లు వినాలి. అమెజాన్ నుంచి ఏదో వస్తుంది తీసుకో అంటరు, కొరియర్ అంటూ ఎవరో వస్తారు. ఇంత ఇంట్లో ఎప్పుడూ ఏదో రిపేరు. నాకు చేతగాదురబాబూ అన్నా ఒక్క సారి పైఫ్లొరుకొచ్చి చూడండి మేడమ్ అంటారు. కింద కొమ్మలు కట్ చేయమంటే నున్నగా కొరిగేస్తరు నేను లేకుంటే. మద్యాహ్నం లంచ్ కి ఒక్కొక్కరు ఒకసారి వస్తారు చూస్తున్నావుగా.

   ఇక రోజుకు ఐదారు సార్లు నా మందులు వేసుకోవాలి. నాపాలిట వరమేంటంటే ఇంకా షటిల్ ఆడడం. పొద్దున్నే నీపాడ్స్ వేసుకుని డ్రెస్ ఛ్చేంజ్ చేసుకుని షూస్ వేసుకుని వెళ్ళొచ్చాక చీర , కాళ్ళకు స్టాకింగ్స్ వేసుకుని ఎన్నని చెప్పను. ఎవ్వరూ నొచ్చుకోకుండా ఎవరి భావోద్వేగాలు దెబ్బతినకుండా ఇంతమందిని కనిపెట్టుకుంటాను. ఏఇంట శుభకార్యం జరిగినా ఏ కార్యక్రమం వున్నా నేనే పోవాలి. ఎవరికీ తీరదుగా. అమ్మా జీవితం చాలా విలువైనది. దాని విలువ ఇప్పుడిప్పుడే తెలుస్తోంది. ఈ కొద్ది సమయంలో  సమాజానికి, కుటుంబానికి, పరివారానికి ఏదో చేయాలని తపన. అందుకే అమ్మా నేను బ్రతకాలి. నాకు బ్రతకాలనుందమ్మా.  నా మనవడూ, మనవరాళ్ళూ దినదినప్రవర్దమానమౌతూ సహస్రదళపద్మాల్లా వికసిస్తుంటే చూడాలనుందమ్మా. కనీసం నువ్వు వున్నంతవరకైనా  నీకోసమైనా బ్రతకాలనుందమ్మా. నా బరువుని ఎవరిపై మోపనమ్మా అనుకుంటూ లోలోపల ఉబికి వస్తున్న నీటిని లోపలే అదిమి తనకు సేవచేస్తున్న తల్లికి మనసు లోనే వందవందనాలు సమర్పించుకుంటూ తడితో తరళాయితమైన కన్నులు తుడుచుకుంటూ లేచింది అక్కడి నుండి.

Monday 2 July 2018

మర్రిచెట్టు

 
   అదే అక్కడ కనబడుతోంది చూడండి మర్రిచెట్టు.  మర్రిచెట్టుకు ఊడలువేసి ఎంత బాగుంది.  చిన్నప్పుడు ఆ వూడలుపట్టుకొని ఉయ్యాలలూగిన రోజులు మరొకసారి మనోఫలకంపై తేలియాడింది.  శిశిరంపోయి ఆమని వచ్చేవేళయిందేమో ఆకులన్నీ నవవసంతానికి స్వాగతమంటూ లేలేత చిగురాకుపచ్చఆకులతో శాఖోపశాఖలుగా విస్తరించి ఉమ్మడి కుటుంబం లా చూపరులకు ఆనందాన్నిస్తున్నది.  దాని కింద సిమెంటు గట్టు రచ్చబండై ఎన్ని వివాదాల్ని పరిష్కరించిందో ఎన్నింటికి మూగసాక్షై నిలిచిందో. ఈచెట్టు ఇంట్లో వుంటే ఎంత బాగుండు కానీ వద్దంటారే అందరూ. 

  అదిగదిగో పిచ్చుకలు వైనవైనాలుగా కొమ్మకొమ్మకు ఎగురుతూ నన్ను వెక్కిరిస్తున్నాయి నీవు నాలాగా ఎగరలేవుగా అంటూ.  అమ్మో దాని మొదట్లో ఎన్నిఊడలు  దాని కైవారమెంతవెడల్పుగానున్నదో...అందులో ఆకలుగుల్లో  పాములున్నాయేమో...ఆ...వుంటే వుండనీగాక  మనలోమాత్రంలేరూ అంతకన్నా విషపునాగులూ. అందర్నీ కలుపుకుని పోవడమేగా జీవనయానం. ఏమంటారు.

Tuesday 22 May 2018

చిన్నారి


  అమ్మమ్మా నేను విసరుతానుఅంటూ తనచిన్నిచేతులతో అమ్మమ్మ చేతిపై తనచేతినుంచి గుండ్రంగా కాస్త ముందుకు వంగుతూ తిప్పసాగింది పెసరపప్పు చేసేపనిలో చిన్నారి. అమ్మమ్మా నేనూ కోస్తాను నాకూ చిన్న కొడవలిలిక్కి ఇవ్వమ్మమ్మా అంటూ తీసుకొని జొన్న చేలో చేరి కొయ్యను కాస్తవంచి కంకులుకోసేసమయంలోఒకసారి వేలుకూడాకోసుకుని రక్తంకారింది. అయినా అలాగే చేయసాగింది చిన్నారి. జొన్న చేలో ఆకుపచ్చ గా పరచుకున్నతీగలకు పసుపు రంగు దోసకాయలపై ఎర్రసారలుపడిన కాయలూకోసింది అమ్మమ్మ తో పాటు.  కోస్తూకోస్తూ బాగా ఎర్రబడ్డకాయలు కరాకరా నమిలి ఎంతతియ్యగుందమ్మమ్మా అంటూఆనందించేది చిన్నారి.
  
   నాలుగు వైపులా గుంజలుపాతి పందిరి వేసి మంచెవేయించాడు తాతయ్య సద్దచేన్లో. అమ్మమ్మతోపాటూ గిన్నెలో సల్లన్నం లూజుగాకలుపుకొని మామిడికాయ పచ్చడి పెట్టుకొని సద్దితీసుకొని చేతిలో వడిసేలతో చెలకవైపు సాగింది చిన్నారి. మంచెమీద ఓవారగాపోసిన గులకరాళ్ళనుండి ఒకటి తీసుకుని వడిసెలలో పెట్టి తిప్పుతూ ఒడుపుగా రైయ్యిమని విసిరిందిరాయి. కంకులు తింటున్న పిట్టలన్నీ ఒకేసారిగా లేసి రెక్కలార్చుతూ ఎగిరిపోతుంటే నిండుగా నవ్వింది చిన్నారి. పలుగురాళ్ళుఏరి నిప్పుల్లోపెట్టి మధ్యలో సద్దకంకులుపెట్టి కాల్చిఇస్తుంటే తిని అమ్మమ్మా ఎంత కమ్మగా వున్నయే ఈపాలకంకులు నువ్వూతిను నువ్వూతిను అంటూ నోట్లోపెట్టి చప్పట్లు చరిచింది చిన్నారి.

  వడ్లో  బియ్యమో  జొన్నలో చెరుగుతూ మధ్యలో అలసిపోయి చీరకొంగు పరచుకుని అలాపడుకున్న అమ్మమ్మ దగ్గర నుండి నశ్యంకాయడబ్బా కొట్టేసి గమ్మున ఏమెరుకలేనట్లు అక్కడే వుండేది కొంటె చిన్నారి. కాసేపు కునుకు తీసిన అమ్మమ్మ లేచి నశ్యంకాయడబ్బా దోలాడి బట్టలన్నీ దులిపి మరీ దొరకక ఓచేటలో రెండుమూలలకు కాసిన్ని వడ్లు పోసి అమ్మా ముత్యాలమ్మ తల్లి అంతా నీమాయేతల్లీ  ఈచేట నిలువుగా వూగితే నీమాయ  అడ్డంగా వూగితే మాపిల్లమాయ అని దంణ్డంపెట్టి చేటని రెండు వేళ్ళతో సుతారంగా మధ్యలో పట్టుకుని చూసేది.  అలా కాసేపు చూసి అంతా నీమాయే  నాడబ్బానాకివ్వు అంటూ వెంటబడితే కిలకిలా నవ్వుతూ ఎలా తెలిసిందబ్బా అంటూ అయోమయంలోనే ఇచ్చేది చిన్నారి.

Sunday 18 February 2018

నేనేమి చేస్తున్నా ప్రక్రుతి మిత్రకి.


    ఈ ప్రక్రుతి కి నేనేమి చేస్తున్నా
   
    ఇంత అందమైన అనుభూతిని ఇస్తోంది

 ఈ నేలకి చెట్లకి నేనేమి చేస్తున్నా

   బ్రతకడానికి నాకు ఆహారమిస్తొంది

 ఈ కొమ్మపూబాలలకు నేనేమిచేస్తున్నా
  రకరకమ్ముల పూల పరిమళాలబ్బంది

  ఈ చిరు కీటకాలకు నేనేమిచేస్తున్నా
  భ్రమరనాదాలతో వీనులవిందు చేస్తున్నాయ్

  ఈ కోనేరు ,తటాకమునకేమిచేస్తున్నా
   జలకన్యలా తుళ్లింత పడుతోంది మనసు

  ఈ ప్రక్రుతి కినేనేమి చేస్తున్నా
  ఇంత అందమైన అనుభూతి నిస్తోంది

  ఈ జన్మలో నాకేదో సందేశాన్ని స్తున్నట్లు
అనిపిస్తోంది కదూ ఎవరినీఏమీ ఆశించకన్నట్లు.